Nos ta purba drecha bida di muchanan na Hulanda Karibense kontando organisashonnan kiko mester kambia pa e muchanan. Pa kada investigashon di Ombudsman pa mucha tin algun regla. Esakinan ta:
- Tur loke bo ta konta nos, ta anónimo. Pues e informashon ta keda pa nos. Ni bo mayornan, dosente òf otro mucha den bo klas no por haña sa kiko abo a kontestá. Den un rapòrt òf publikashon nunka nos ta menshoná bo nòmber. Nos ta usa únikamente loke bo a konta nos.
- E informashon ku bo duna nos, ta keda serka nos. Pues serka Ombudsman pa mucha. Nos no ta kompartí esaki ku otro hende!
- Partisipashon na e investigashon di Ombudsman pa mucha ta boluntario. Bo por konta nos tokante bo bida, pero esaki no ta obligatorio! Tambe bo por stòp ora ku bo ke, asta na mitar òf ora bo ta kasi kla.
- No tin kontesta bon òf malu! Nos ke tende kon ta bai den bo bida; kiko ta bai bon i kiko no. Si tin algu ku bo no ke kontestá, esei tambe ta bon. Abo ta disidí kiko bo ke konta i kiko no.
- Bo mes por disidí si bo ke partisipá na nos investigashon òf nò. Probablemente bo mayornan lo haña bon pa sa esaki. Si bo ta duda tokante partisipashon, bo por papia tokante esaki ku bo mayornan (di kriansa) òf un otro hende grandi ku bo ta konfia. Bo por mustra nan e website pa nan sa kiko esaki ta trata. Den kaso ku nan tin pregunta semper nan por manda nos un mail na onderzoek@dekinderombudsman.nl.
Informashon general tokante Ombudsman pa mucha
No ta importá kuantu aña bo tin òf di unda bo ta: tur hende tin derecho. Pues mucha tambe! Ta p’esei tin lèi i regla ku ta protehá mucha. Ombudsman pa mucha ta kontrolá si gobièrnu i otro organisashonnan na Hulanda Karibense ta tene nan mes na esaki.
Ombudsman pa mucha ta yuda mucha i hóben te ku 18 aña pa defendé nan derecho. Imaginá bo ku bo tin un problema ku un organisashon, manera bo munisipio, un ministerio, kuido di hóben (jeugdzorg) òf polis. Pasó abo ta haña ku nan no ta anda debidamente ku bo derechonan. Na momentu ku bo tuma kontakto ku nos tokante esaki, nos por konsehá bo, papia ku e organisashon òf nos ta start un investigashon.
Pa hasi e trabou akí bon, nos ke tende di muchanan kon ta bai ku nan. Nos ke sa kiko ta bai bon na Hulanda Karibense. Pero tambe kiko mester drecha pa mucha i hóben. Ta p’esei nos ta pidi mucha i hóben pa yuda nos den tur investigashon ku nos ta hasi. Di e manera ei, nos por duna mihó konseho na e organisashonnan ku mester tene nan mes na derecho di mucha.
Investigashon periódiko ‘Si bo puntra nos’ (Als je het ons vraagt)
Un biá kada dos aña nos ta hasi e investigashon yamá ‘Si bo puntra nos’ bou di tur mucha na Hulanda Karibense. Mayoria di biá, nos ta kombiná esaki ku un “Gira Derecho di Mucha”. Nos ta pone e kuestionario online i nos ta papia ku hopi mucha i hóben na Hulanda Oropeo i Hulanda Karibense. Di e manera ei nos ta haña masha hopi informashon, i informashon importante. E informashon akí tambe ta importante pa investigashon sientífiko. Ta p’esei tin biá sientífikonan por hasi uso di nos informashon. Pa duna un ehèmpel: nos tin bon kontakto ku Universidat di Groningen. Studiantenan di Groningen por usa informashon di nos investigashon pa nan estudio. Pero e ora ei tambe ta keda konta ku loke abo a konta nos ta keda anónimo; pues nan no sa ken abo ta!