Ombudsman pa mucha ta pidi atenshon urgente pa e falta di lugánan na skolnan di fundeshi na Boneiru

Ombudsman pa mucha Margrite Kalverboer: "Na e momentu aki tin mucha na kas ku no hañando niun forma di enseñansa. Mi ta haña esei sumamente preokupante. Pasobra mas tempu muchanan ta na kas, mas konsekuensianan esaki tin pa nan karera eskolar i nan desaroyo. Muchanan tin derecho riba enseñansa. Pero ku e situashon aki, e derecho ei ta bou di preshon. P'esei, mi ta urgi Sekretario di Estado pa atendé ku esaki mas pronto posibel." 

Kehonan di mayornan 

Ombudsman pa mucha a risibí vários keho di mayornan. Nan ta indiká ku nan yu no por bai skol pasobra e skolnan di fundeshi ta yen. Esaki tin hopi konsekuensianan pa mucha, pero tambe pa mayornan ku tin biaha ta haña nan mes obligá pa keda kas. Debí na esaki, nan ta kore riesgo pa pèrdè nan trabou i ku esei, nan entrada. Ku tur e konsekuensianan ku esaki ta trese kuné. 

Koperashon difísil

Despues di deliberashonnan ku instansianan enbolbí na Boneiru i na Hulanda, Ombudsman pa mucha ta mira opstákulonan ku no ta kontribuí na un solushon struktural. Por ehèmpel, no tin enfoke kompartí i konstruktivo pa solushoná e situashon strukturalmente. Ombudsman pa mucha ta urgi tantu Ministerio di OCW komo e instansianan enbolbí na Boneiru pa hasi máksimo esfuerso pa solushoná e falta di lugánan na skol di fundeshi mas pronto posibel.