Na 2024, Ombudsman pa mucha a risibí 1.812 petishon di muchanan, mayornan i profeshonalnan. E petishonnan prinsipalmente tabata trata di enseñansa, yudansa hubenil, outoridat paternal i derecho di bishita, pobresa i derecho familiar. Segun Margrite Kalverboer, por a evitá hopi di e problemanan aki si lo a komprobá delantá si leinan i maneho por perhudiká muchanan.
Yudansa mester ta di fásil akseso
Ora muchanan òf hóbennan tin mester di yudansa, frekuentemente ta bin resultá ku ta difísil hañ'é òf komprondé unda mester akudí. Organisashonnan no ta laga sufisientemente kla kon pa pidi yudansa òf kiko por ferwagt. Ademas, e opshonnan ta varia entre munisipionan, por ehèmpel pa loke ta trata yudansa hubenil òf transporte di studiante. "Na e momentu aki, e echo si ta kumpli ku bo derecho òf no, muchu frekuentemente ta dependé di unda bo ta biba. No mester ta asina, pasobra derechonan di mucha ta apliká tur kaminda i pa tur mucha," Kalverboer ta bisa.
Pasonan importante: prueba di derechonan di mucha i E Mihó Desishon
Pa yuda esnan ku ta traha legislashon i maneho pa evaluá delantá ki efekto reglanan nobo òf eksistente tin riba e kumplimentu ku derechonan di mucha, na 2024, Ombudsman pa mucha a desaroyá e prueba di derechonan di mucha. E meta di esaki ta pa evitá posibel problemanan pa mucha na momentu ku ta implementá legislashon i maneho. Margrite Kalverboer: "E instrumentonan aki ta sirbi pa evaluá delantá kua gruponan di mucha por keda perhudiká – sin intenshon – pa maneho. Asina nos por evitá di intervení solamente ora ya ta muchu lat."
Ademas, el a presentá un vershon mehorá di e plan di paso E Mihó Desishon, loke ta yuda pa laga e bos di mucha i nan desaroyo den sentido amplio berdaderamente konta pa loke ta trata desishonnan ku ta afektá nan.
Preokupashonnan tokante di gruponan vulnerabel
Un investigashon grandi entre 2.729 mucha i hóben tokante di kalidat di bida, a mustra ku mucha muhénan di 13 pa 18 aña ta ménos felis i ta sinti nan mes ménos seif, prinsipalmente online. Hóbennan ku no ta identifiká komo mucha hòmber òf mucha muhé tambe ta eksperensiá ménos siguridat i felisidat den bida diario. Margrite: "E diferensianan ta preokupante. Nos ta urgi gobièrnu pa tene mas kuenta ku diferensianan di edat, di género i di pasado. Tur mucha mester sinti ku ta tene kuenta ku nan i ta protehá nan, offline i online."
Separashon ta doloroso, sigur pa mucha
Na 2024, Ombudsman pa mucha ademas a risibí hopi señal tokante di divorsionan kompleho. E investigashon ku Ombudsman pa mucha a hasi tokante di e tópiko aki, a mustra ku mucha muhénan ta sinti nan mes mas infelis tokante di e asuntu aki ku mucha hòmbernan. Yunan di mayornan separá tambe a indiká ku nan ta sinti nan mes ménos stimá i ku nan ta eksperensiá ménos siguridat na kas. "No por remplasá mayornan. Spesialmente den kaso di separashon nan enfoke sentral mester ta nan yunan, sin importá kon difísil esei por ta," Margrite ta bisa.
Muchanan meresé klaridat, siguridat i apoyo
Den su relato anual, Ombudsman pa mucha ta urgi gobièrnunan i instansianan pa skucha muchanan mihó, pa siña di fayonan i pa hasi yudansa mas aksesibel. Margrite: "Muchanan no ta chikitu ora ta trata di nan derechonan. Nan meresé pa nan interesnan wòrdu tumá na serio, den tur desishon ku ta afektá nan."