Lanta den pobresa
Lanta den un famia ku ta biba den pobresa sa tin hopi efekto riba bida diario i e desaroyo di mucha. E ta kousa hopi strès pa tur miembronan di famia, i e tin influensia riba kriansa. Mayoria di e famianan den pobresa ta bou di hopi preshon, loke ta pone ku tin tiki tempu i trankilidat pa e kriansa di muchanan. Komo konsekuensia, tin mas probabilidat – entre otro – di abandono eskolar di e muchanan aki.
Ombudsman pa mucha Margrite Kalverboer: "Muchanan ku ta lanta den pobresa sa eksperensiá vários problema den diferente tereno. Nan ta kore mas riesgo riba retrasonan i e situashon aki ta hasi muchanan vulnerabel. Esaki por kousa ku ta pasa pobresa di generashon pa generashon. P'esei, ta nesesario pa gobièrnu berdaderamente kuminsá duna pasonan."
Mester di mas ku solamente sèn èkstra
Nationale ombudsman i Ombudsman pa mucha ta ripará ku ainda no ta aktuá sufisientemente pa mehorá e situashon di hende den pobresa na Hulanda Karibense. E problemanan ku hende ta eksperensiá sa bai mas aleu ku problemanan finansiero so. Tambe ta trata di bon alohamentu, enseñansa, kuido i apoyo sosial. Apesar ku gobièrnu ta bai di akuerdo ku e rekomendashonnan i konklushonnan di e tres rapòrtnan anterior di e Ombudsmannan, e ta tarda demasiado pa pone man na obra konkretamente ku esakinan.
Nationale ombudsman Reinier van Zutphen: "Ta importante pa no yuda hende solamente ku mas sèn. Perkurá ku – banda di un mínimo sosial realístiko – muchanan i nan mayornan tambe tin akseso na mihó opshonnan di kapasitashon. Alohamentu apto i pagabel tambe ta importante. Mi ta komprondé ku kombatimentu di e problemátika di pobresa ta un asuntu kompleho, pero a yega ora pa gobièrnu tuma akshon. Nos mester sòru ku tur habitantenan di Hulanda Karibense tin un perspektiva positivo."
Mester kibra e sírkulo di pobresa
E kombatimentu di pobresa na Hulanda Karibense ta rekerí un intervenshon lihé. Nationale ombudsman i Ombudsman pa mucha a ripará ku solushonnan anterior mayoria biaha tabata pa término kòrtiku. P'esei, ta importante ku awor gobièrnu ta bini ku solushonnan duradero pa kibra e sírkulo visioso di pobresa. E Ombudsmannan ta enfatisá ku ta krusial pa desaroyá e solushonnan huntu ku e habitantenan (grandi i chikí) di Hulanda Karibense. Den e marko aki, ta importante pa tene kuenta ku e diferensianan kultural, e eskala chikí di e islanan i e falta di konfiansa ku ta eksistí pa ku gobièrnu.
Download Problemátika relatá na pobresa na Hulanda Karibense